ياظهري اصبر على الطعنات ماترزا***مافيك يدري سهوم اللاش مغروزه
اللاش مايقترب صدري من العجزا***مايرمي الا القفاء وايديه مهزوزه
بعض العرب مايضوي له عشر معزا***يطعنك ياظهري الغافل بعكوزه
المصلحه في حياته دايم المغزا***لوماعطيته تقول منقز افيوزه
لااقفيت من حر مابه قام يتمهزا***ولااقبلت قدام وجهك مافتح بوزه
بعض العرب لو ضحية نحر مايجزا***اعور وهريان والقرنين مجزوزه
السوق نعرف كنوزه ساعة الفرزا***نعرف عقيقه وياقوته وفيروزه
الحر وقت اللزوم يقوم بالرمزا***يفز كنه على الاول ضمن فوزه
اما الهدان ان جبرته قام بالنغزا***تقول رجليه بالسكين محزوزه
أهل الفتن الغشيم تنقزه نقزا***مجالسه بينهم في سر محجوزه
يقلون له انت من بين العرب كنزا***عندك جواهر ولكن ليش مكنوزه
قام ايتخبط ولا للعاقبه يحزا***لاقالوا اهل الفتن ياراعي النوزه
من صغر عقله على جمر الغضى ينزا***مايدري المصيده في الدرب مركوزه
أهل النمايم كثير هروجهم لمزا***هدفهم إيصيرمابين العرب حوزه
اللي بجنبه جرب لزو داخل الحجزا***يعدي الصحيحه ولو في شبك مفروزه
عقول بعض العباد محرزه حرزا***مفتاحها في يد الشيطان للعوزه
لاجيت تنصح شبابٍ لابس الجنزا***قام ايتحداك يلبس فوقه ابلوزه
حنا عرفنا هروج اللمز والهمزا***والخبزه اللي مع الايام مخبوزه
صدور الابيات جائت قافيتها زا***والعجز للبيت جاء بالقافيه اوزه
ياظهري اصبر على الطعنات ماترزا***مافيك يدري سهوم اللاش مغروزه