للهم في صدري كثير اجتوالي=صهيل وخيول وحروب وعزاويه
والكبد يصلاها من النار صالي=والصبر يا قلبي لجرحك يداويه
كم نحمتل يا حزن بأول وتالي =الحزن لو نخفيه بانت مواريه
يا وقت وش سويت تصرم حبالي =يا فاجع الخلان غالي بغاليه
جاني خبر يا حسام يا وجد حالي =من صدمتي قمت أتخبط وأناديه
يا خالي اللي راح بالحيل غالي =لو ينفدى يا ناس والله لفاديه
إن عدو الأخوال يا حسام خالي =خالٍ يشرفني بفعلـه وطاريه
انا أشهـد إنه من زحول الرجالي =تشهـد لـه العربان من طيب ماضيه
رجلٍ جمع صمتٍ على وسع بالي =وإن جا نهار الجـد ما أبعد هقاويه
من روس قوم مخضبين السلالي =يوم أشهب البارود للجو غاشيه
ستر العذارى زاهيات الدلالي =لـه هيبةٍ ترهب من الضلع عاليه
ياما ذبح من حيل وسط الحلالي =ربعه يعزونه وتشهد عوانيه
جنب عن النمات قيلٍ وقالي =ما يتبع الغفلات هاذي وهاذيه
حلحيل حلالٍ لفتل الحبالي =والخصم من فتلـه بحبلـه يلاويه
يكرم عن الزلات وأهل الضلالي =حرٍ تعلى بالشواهق مرابيه
مزبان للخايف وحصن وظلالي=حصنٍ وسيسانه تجود مبانيه
درب المراجل لمها بالحلالي =الصدق يبرالـه ومرٍ يباريه
مرحوم يا خالي كريم السبالي =إعداد ما هبت نسايم ذواريه
وإعداد ما هبت هبوب العوالي =وإعداد ما يسبح من الغصن ناميه
وإعداد ما يبدي بنوره هلالي =وإعداد من صلى لربه يناجيه
يا عالمٍ بالسر دق وإجلالي =تكتب لـه الجنة عن النار تاويه
وصلوا على المختار خير الرجالي =محمد المبعوث بالحق هاديه