أمس العصر مرّت علينا سحابه=جادت بها ريح الشتا وامطرتني
هتّانها شَرّع من الشوق بابه=ورياحها باقصى الحشا ذعذعتني
برّاقها صوّر وليفي وجابه=واستانس الوجدان يوم ارعدتني
كَنّه يناديني وانا بالاجابه=أطوي دروبٍ يم حضنه دعتني
سجيتها رحلة عظيم المهابه=كني زعيمٍ والبشر توجتني
أمشي وخفّاقي يزيد التهابه=تمشي معي غيمة شتا خايلتني
واقبل وتلقاني بصدر ورحابه=بالمرحبا وبعينها قلّطتني
واسهر لها فله وضحك ودعابه=بشفاتها واحلى نغم نادمتني
تاخذ وتعطيني عدود الصبابه=واقرب من الهمسه عيونٍ سرتني
واسري وقلبي ثابتٍ في جوابه=معشوقتي وبدمعها ودعتني
و اقفي على دربي بـ هم وكآبه=فارقتها واحزانها رافقتني
يوم انتبه عقلي و رَجّع صوابه=وتلاشت بروحي وصوفٍ خذتني
أثري تخيلت الغضي في غيابـه=مكنون غيمه فالشتا صاحبتني
ليت الغيوم اللي تشكّل غرابه=تعكس تواصيفٍ لك الله برتني
لجل ان حظي صايرٍ في سحابه=لكنها حنّت علي وامطرتني