يـا مــل قـلـبٍ تلـتـه ســود الأيــام=تـلـة حـزيـنٍ جــر قـــوس الـربـابـة
جـر اللحـن والـنـاس هجـعـا ونـيـام=فـي راس مرقـابٍ سـوات الذيـابـة
يــوم إن صــدره ضــاق هـــمٍ وآلام=بــدع أبــو بـتـال مــن حـــر مـابــه
مـاراح يشكـي ضيقته بيـن الأعـلام=ولا شـكـى للـنـاس مـمــا أصـابــه
ماشا رجال وقد عـرف عـدة أقـوام=وحاول يوصـف بعضهـم فـي كتابـه
فرجـلٍ ليـا جيـتـه تلاقـيـه غـشَّـام=يرقـى سنـود ومـا يـهـاب الحـرابـة
يفـك عـسـرات المشـاكـل وعــزَّام=حكـيـم حـــلال الـعـقـد والنـشـابـه
يعجـبـك مــع ربـعـه تلاقـيـه تـمَّـام=وافـي وبالجـزلات عـامـل حسـابـه
كـريــم فـــزاعٍ ونـشـمـي وغـــرَّام=وبالمرجلة والجـود امضـىشبابـه
ويـومٍ غـزاه الشيـب مـا عـاد ينـلام=قفَّـى كمـا مـزنٍ تشيـلـه سحـابـة
هذا الـذي لـو مـات نحـزن وننضـام=ويبكي على فرقاه كل من درابـه
ورجـلٍ سويـد الوجـه أهيـم ونمـام=تـلـقـاه بـيــن الـنــاس وزع كـذابــه
يسعى في الفتنـة مخـرب وهـدام=يشقـر عصـا ربعـه وينـشـر خـرابـه
أفعى وينشر في سمومه وضـرَّام=لـلـشـر والأحـقــاد مـفـتـوح بـابــه
بيـاع متـعـدوي حـسـودي وعــوام=هــمــاز لــمــازٍ ولا يـنـتـخـى بــــه
يحـلـف لــك الأيـمــان زورٍ وجـــزَّام=ويلبـس حـرام ومآكلـه مـع شرابـه
هـذا الـذي ودك تـدوسـه بـالأقـدام=وتاطـا علـى صفحـه وتاطـا غـرابـه
من كان مثله ياعسى موته إعـدام=والنـاس تفـرح لا اندفـن فـي ترابـه
ورجــلٍ حـرامـي ومتـلـصـص ولآم=يـسـرق جـيـوب آخــوه ولا غـرابـة
دني يبيـع النـاس ضـاري بالإجـرام=وتشـوف فـي وجهـه أثـار الربـا بـه
مايصخي ريالـه علـى طـول الأيـام=عـبـد الـدراهــم راح رزقـــه نـهـابـه
تـلـقـاه يـتـسـول ولابـــه تـحـشَّـام=ويهـيـن نفـسـه للـغـنـي بالـذنـابـة
بـريــال تـتـوطـأ جبـيـنـه ويـنـسـام=وبريـال تاخـذ مـا تبـي مـن زهـابـه
ورجـلٍ منافـق ومتـسـودن وكــلَّام=حـربـا وتـعـرف علـتـه مــن جـوابـه
متلصق ويحسب من النـاس غنَّـام=والنـاس تضحـك بـه وتنتـف شنابـه
مـالـه ولا هـرجـه ولا راي وأعـــلام=وليا انفرد مع شخص قام وسرابـه
يلعب على الحبليـن خايـن وخمَّـام=وجهه كمـا مقفـاه وش ينبغـى بـه
هذا الذي لو مات موته ماهـو هـام=حيـاتـه ومـوتـه ســـوى وتـشـابـه
ورجـلٍ كثيـر الهـرج مـوذي وشتَّـام=مــا يـهـرج ألا فــي دروب العـيـابـة
مـن كثـر مـا يهـرج تحـمـل بـالآثـام=ولحـم العـرب تلقـاه نـاشـب بنـابـه
في مجلس الرجال يمدح وإلى قام=سبه وتلحـق سمعتـه فـي غيابـه
سفيه يرمي في قفا الناس رجَّـام=وبـالـزور والبـهـتـان يـكـثـر سـبـابـه
ثرثار في الباطل وفي الحـق كتَّـام=أعـوذ بـالله منـه وش ينصخـى بـه
ورجـلٍ خـذا الدنيـا شراهـه ورمـَّـام=همـه بكرشـه تمتلـي مـن خلابـه
يقلـط بـلا ضيفـه طفيلـي وشمَّـام=سـلـع ولا يـشـبـع شـبـيـهٍ لـدابــه
يدني ومستشره يخطف بالأعظـام=واللـي معـه يدنـي يخـاف البـدا بـه
ماهمـه ألا فـي المطابـخ والإيــدام=وعشريـن وجبـه كتهـا فـي علابـه
ورجلٍ خذا منصب كبيـرٍ مـع وسـام=وجمـع مـن الأمـوال واظفـى ثيابـه
لا هـو نفـع ربـعـه بـوقـت التـحـزَّام=ولا هـو حفـظ بالـود حتـى القـرابـه
فـي الواجـهـه رجــال والسـرهـلَّام=هـلامــةٍ نـاقــص عـلــوم الـذرابــة
ودك على الكرسي تلجمـه بلجـام=وتـحـمـلــه طـاقــيــن ولا تـهــابــه
ورجل عمـاه الله حسـودي وغمَّـام=يحسـد جميـع النـاس مـا ينـدرا بـه
عــدو لخـالـه والقـرابـة والأعـمــام=ولأخـــوه وعـيـالـه يـــدور نـشـابـه
ولا يـريـد الخـيـر لأهـلـه والأرحـــام=ويمـوت حـسـرة كــل يــوم وكـآبـة
تلقاه متضايق علـى طـول منضـام=والنـار صــارت فــي فــؤاده لهـابـه
كريه مـن وجهـه علـى طـول لـوَّام=ومن كثر حقـده المـرض قـد بلابـه
ورجـلٍ عزيـز النفـس بالعـز قـد رام=قنوع في عيشه هنـا وارتضـى بـه
صابـر علـى مــر الليـالـي وهـمَّـام=لـو كـان جايـع والفـقـر الـتـوى بــه
لا هــو بـشـحـادٍ ولا هـــو بـقـمَّـام=ولاهو ارتشى بالمـال وألا رشـا بـه
صلى فـروض الله وزكـا وقـد صـام=وحـج وتشهـد وارتجـى مـن ثـوابـه
هذي وصايـف قلتهـا مثـل الأحكـام=واختر رفيقـك والرجـل مـن صحابـه