أثناء قرائتى لكتاب روائع صلاح جاهين وجدت عنوان جديد لرائعة عنوانها ( لاجىء )

وجدتها مؤثرة جدا وتصف حال أى فلسطينى هذه الأيام بغزة
ثم شردت قليلا وسألت نفسى ... هل صلاح جاهين كتب هذه الرائعة للمستقبل قبل أن يرحل عن هذه الدنيا لعلمه أن الحال سيظل بأهل فلسطين ولن يقف معه أحد وسيظل هكذا الى أن يأذن الله بالشعوب فقط لعمل أى ردة فعل ولكن فى نهاية أبياته وجدت فيها الأمل الذى ننتظره جميعا

هيا بنا لنقرأ من الروائع المختارة لصــلاح جاهـــين


لاجــــــــــــــــــــــــىء

حابس ضناه بين ضلوعه

يابس وحايموت بجوعه

قاعد ما بيعملش حاجة

لابس هدوم مش بتوعه

لاجىء قابلته فى غزة

وله عيون مشمئزة

راحت فلسطين وراحت

البيارات لما لاحت

على التلال المدافع

وريحة الحرب فاحت

وفى الصفوف الطويلة

جرجر عياله النحيلة

شيع جنازة الوطن

لحد ما اندفن

والقاتل الوغد ساقه

قدامه من غير كفن

ميت وقبره الخلا

والغسل سيل الفلا

الرمل يسخن ويبرد

وهو هايم مشرد

مع الطابور اللى رايح

الى المصير المجرد

وفى الطابور ألف أسرة

وخمسميت ألف حرة

حسرة عذارى حزانى

ع الخوخة والبرتقانه

اللى الشباب لم قطفها

والموت خطفهم خوانة

يا ويل كعوبك يا لميا

الرملة لسعتها حامية

الرمل ساخن بيكوى

خالد بيصرخ ويعوى

مسجون فى أول حياته

((يحرق سماه ايش يسوى))

وتستمر الجنازة

وللجبال اهتزازه

الحرب سحقت أملهم

لما صبح فى خيالهم

زى الرمال بيخوضوها

زى الطحين اللى جالهم

من الايدين السمينة

اللى رمتهم رهينة

على الرمال كوموهم

تحت السيول نيموهم

وكمموا معين بسيسو

من بعد ما كمموهم

علشان معين المناضل

بيقول يا ويلك يا قاتل

يا معين يا صوت الضحايا

ارعد بصوتك معايا

ارعب عدوى وعدوك

راح ننتصر فى النهاية

خلى اللى حابس دموعه

يبكى بفرحة دموعه

للبيارات الحبيبة

بعد الرمال الرهيبة

اصرخ فى شعبك وقول له

ساعة خلاصك قريبة

انهض وكافح وطهر

البرتقال راح يزهر