يالله يامطلوب ياعالي الشان= ياواحد(ن) كل العرب ترتجي به
ياخالق بن آدم وياخالق الجان= والطير في وسط الفضا تعتني به
نعوذ بك من كل غادر وشيطان= ونعوذ بك من كل فتنه غريبه
اسم الوطن شامخ على كل الأوطان= اسم الوطن من حقنا نحتفي به
على تراب ارضه ولد أفضل إنسان= محمد اللي كلنا نقتدي به
محمد الهادي ليا خير الأديان =مبعوث للأمه وهي مستجيبه
وأنجب أبو بكر وعمر ثم عثمان= وعلي كريم الوجه يخشى لهيبه
وعلى تراب أرضه نشأ خير فرسان= مثل صلاح الدين وأبو قتيبه
وتغير التاريخ كله علشان =ترك الشريعه في ظروف عصيبه
وساد التخلف فالوطن عبر الأزمان= والجاهليه سارت إلهم قريبه
اهل الجزيره كانوا شعوب شتان= والحرب مابين القريب وقريبه
مرض وفقر وجهل مع ضعف الإيمان= مصيبه ياكبرها من مصيبه
وجاء المجدد يمتطي صهوة حصان= يحمل هموم الأمه المستصيبه
محمد بن سعود مع بن سليمان= اعادوا التوحيد بعد المغيبه
ومرحوم ياشيخ(ن) يسمى كحيلان= عبدالعزيز إله مضارب عطيبه
وحد جزيرتنا وخلا لها شان= بين الدول لها مواقف صليبه
دولة سعوديه لها المجد عنوان= جعل لها الإسلام قوة وهيبه
حكامها آل سعود ذربين الإيمان= مافيهم آل سعود شك وريبه
ومن بعد أبو تركي مناعير ظفران= الكل منهم كلنا نعتزي به
واليوم في عهد الرخا عهد شيهان= في عهد أبو متعب عسالله يثيبه
وجه الندى وجه الفضيله والإحسان= كفه على بذل العطايا نجيبه
يده لفعل الخير في سر وإعلان= جمع كلا الضدين قوه وطيبه
وعضيد عبدالله في الحكم سلطان= ليا دعانا لازم إنا نجيبه
خيره على شعبه مثل وبل هتان= يعطي بدون حساب والله وهيبه
وأخوان نوره كلهم نعم الأخوان= صقور العرب لهم مواقف رهيبه
تحكم بشرع الله على كل من كان= ماهمهم راعي الخطأ والغليبه
واللي بغا فتنه وظلم(ن) وطغيان= يكفينا فيه الله وربي حسيبه
خسران يامعادي هل الدين خسران= المنحرف فالفكر مانهتدي به
الحمد لله ياوطن أمن وأمان= غصبا" عن الإرهاب واللي يجيبه
حنا سعوديين حضر(ن) وبدوان= اللي يعا دي دارنا نعتدي به
من حائل الشمال لاحد نجران= ومن الحسا شرقا" لمكه وطيبه
حنا فداء للمملكه بغلا الأثمان= قاله خديدي من قبيلة عتيبه
وصلوا على من خصه الله بقرآن= أفضل كلام عندنا ننتهي به