يقول اللّي بنى قافه وقال = وهو مابين ميل واعتدال
ويحزا في تماثيل الرجال = وينقدها ليا جا في المظالي
بنى المعنى على باب وسيع = سوالف للقبايل ما تضيع
وفاح الصدر من هيضٍ يريع = سوات الجمّ من عدّ الزلالي
بعد قاس الزمان وما قساه = وفكّر في الورود وفي عزاه
ولا اللازم على الممشى حداه = وترك دقّ روحه والجلالي
مشى من قهوة الطايف ضحى = على اللي يوم سيّر وانتحى
كما برق الحيا لا لوّحى = مخاطر ما حسب شمس وظلالي
وطا رضوان وانحى للمويه = وانا ما اسمع واحق الا دويه
وهو مسرع ودربه ما غويه = ويطوي في الحزم طي الحبالي
تعدّى ظلم واوقف في عفيف = تقهوينا واكلنا شي خفيف
وسرّانا لبيبانه صريف = ولا حسّب لظلمات الليالي
ونصّ الليل وهو في مرات = بغى المقعاد فيها والمبات
وقلنا سرّنا ماشي فوات = ترى المسرى في اتلى الليل حالي
تقهوينا وسرّا ما استراض = وتال الليل وهوه في الرياض
وصلنا يوم نور الصبح ناض = وصلينا وندعي في القبالي
اخذنا فيه مده حايسين = نبى مخرج من العار المبين
واقام الله حظ المستحين = وجمل ماسبق وابرا التوالي
بعد واحد في الماقف عثر = وواحد يوم نادينا اعتذر
وقال يسِدّ عواض وخضر = واخذنا العذر فيْد وراسمالي
حموا ميقافنا روزة خديد = ودرَّقنا على زيد وعبيد
ثمان سنين ابينا نستريح = وكل ذلّ والصايح يصيح
وفي ايام السعد كل فصيح = وفي الضيقا عديل ام العيالي
تعبنا والتعب با موالنا = نكافي لا تروح ارواحنا
و لا يفرح بها شماتنا = وضدتنا من الجنب الموالي
تعبنا فا لحمايل لين جات = وطلّعنا الهتيل امْع الثقات
وخلينا العلوم مزلفات = وياكم شال ابو زيد الهلالي
ان ابدينا معانينا اوجعت = وان اخفينا في الجوف اجرحت
وكمَّينا عليها ما بدت = صبرنا والبرو بعده جمالي
صبرنا ما نبي يبدي عيوب = وقلنا جتْ على الغافل غصوب
صنيع اولاد عبدل و اللهوب = جمايلهم لنا مع كل جالي
تبي تقعد في اللوحة بيان = ومن دان العرب لازم يدان
وكل يعترف يدري هدان = وراع الصدق له ميقاف عالي
هذا و مارد من بالي وفاض = وكل في سوالفنا استعاض
نهار امضى (....... ) اعتراض = وفازوا به مخاتيل الرجالي
وحطوا بينهم فازة وعيد = وقالوا دوب جا الراي السديد
ولا حزّوا هروج اللي بعيد = وداخت روسهم في كل حالي
لكنّ الكل منا لا يضيق = ليا جات الخطية من صديق
ولا ننسى معاريف الرفيق = ولا يغبى الجميل أول وتالي
وحنا ربعهم مانحن ضعوف = نرد الضامية واللي عيوف
وننصا خصمنا وهوه يشوف = ونحميها سهلها والجبالي
وهذا الختم ذكر الله ختام = وذكر المصطفى بعد الكلام
عليه الفين صلوا ياكرام = شفيع الخلق في يوم الهوالي