أقوله وانا بادي في المرقب العسر = في ديرة محدٍ طلع في عسورها
ديرة خديد اللي لها المدح ينذكر = في هيبة الله ثم هيبة نمورها
طلعت فيها قبل يبدي لي الفجر = قعدت فيها لين جتني نشورها
طالعت فا لديرة ودققت بالنظر = ولاها دهور وشيبتني دهورها
وفكرت فا لأيام وتصرّف القدر = ولا عَوَجها قام يغلب قطورها
يوم ٍ يفرحنا ويومٍ على كدر = ويومٍ حلاها ما يكفّي مرورها
وهكذا الدنيا على سكة الخطر = ما قِط دامت للخلايق سرورها
واللي طمع فيها ولا ياخذ الحذر = يتعب ويعمى من مصارع غرورها
تاهت عليها الناس عمين بلا بصر = وابليس معميها ومخلف شعورها
وقلوبها شتى كما الحب لا نتثر = والحِسد والكيد اتقا في نحورها
واحد يبا الشيمة وماشي في القطر = وعايف من الدنيا وكاره شرورها
راحت عبيدية على الشيخ والجبر = والمستحين اليوم عميت بصورها
راحت عبيدية على صفة الحشر = والايام لقتنا محاني ظهروها
ما عاد يبقى يدري الشمس والقمر = وباق المعاني ما بقا الا عشورها
حتى الحنادي ودها تغلب النسر = وقامت حباريها تسابق صقورها
لكن يا للي بيدك الحكم والأمُر = الايام ترفع في غضبها وجورها
يا للي رزقت الحوت في غبت البحر= ورازق طيورٍ جايعه في وكورها
يا ربي انك تسقي الأرض بالمطر = حشمة شجاريها وحشمة طيورها
والختم صلى الله على سيد البشر = فا لقبة اللي كل مسلم يزورها